Baydhabo,(insidesomalia.org) Xildhibaan ka tirsan baarlamaanka Soomaaliya ayaa gurigiisa xalay weerar bam lagu qaaday, iyadoo dagaalkaas ay ku dhinteen laba ruux oo mid ka mid ah uu isagu dhalay, halka ruuxa kalena uu ahaa wiil ay daris ahaayeen.

Mudanaha gurigiisa la weeraray ayaa lagu Magacaabaa Maxamed Xuseen Raage, iyadoo weerarka oo ahaa bam gacanta laga tuuray ay xigtay rasaas aad u xoogan oo ay is dhaafsadeen ilaalada xildhibaanka iyo kooxaha weerarkan ka dambeeya.

"Weerarku wuxuu ahaa mid qorsheysan, waxaana ku dhintay wiil aan dhalay iyo wiil daris nala ah, waxaana ku dhaawacmay mid ka mid ah ilaaladeyda oo lagu daweynayo Isbitaalka Baydhabo" ayuu yiri Xildhibaan Raage.

Xildhibaanku wuxuu ka gaabsaday inuu ka hadlo cida ka dambeysa weerarka gurigiisa lagu soo qaaday, isagoo sheegay in xildhibaanada oo dhan ay ku jiraan khataro cusub oo soo wajahay.

Habeen hore ayay ahayd markii weeraro noocaan oo kale ah lagu qaaday guriga Xildhibaan Cismaan Caato iyo Guriga Xildhibaan Prof. Dalxa oo ah ku xigeenka koowaad ee Baarlamaanka Somalia.

Sidoo kale waxaa weeraro bam maalmo ka hor lagu qaaday guryaha ay Baydhabo ka dagan yihiin xildhibaanad Caasho Axmed Cabdalla iyo Xildhibaan Cabdi Axmed Dhuxuloow (Dhegdheer) kuwaasoo aan geysan wax khasaarooyin ah.